എഐ ആണെന്ന് കളിയാക്കിയവർക്കുള്ള മറുപടി, വൈറലായി 'കൂലി' ഫ്ലാഷ്ബാക്ക് സീനിലെ രജനിയുടെ ചിത്രം

രജനികാന്തും ലോകേഷ് കനകരാജും ആദ്യമായി ഒന്നിച്ച ചിത്രമാണ് കൂലി. ആഗോള തലത്തിൽ 500 കോടിയ്ക്കും മുകളിൽ സിനിമ നേടിയെങ്കിലും പലയിടത്തും ചിത്രം ആവറേജിൽ ഒതുങ്ങേണ്ടി വന്നു. എന്നാൽ സിനിമയിലെ രജനികാന്തിന്റെ ഫ്ലാഷ്ബാക്ക് സീനുകൾ വലിയ തരത്തിൽ ചർച്ചയായിരുന്നു. വിന്റേജ് ഗെറ്റപ്പിലായിരുന്നു രജനി ഈ സീനുകളിൽ എത്തിയത്. ഇത് എഐ ആണെന്ന തരത്തിൽ വിമർശനങ്ങൾ ഉയർന്നിരുന്നു. ഇപ്പോഴിതാ ഇതിന് മറുപടിയുമായി എത്തിയിരിക്കുകയാണ് അണിയറപ്രവർത്തകർ.

ഫ്ലാഷ്ബാക്ക് സീനിന്റെ ഷൂട്ടിംഗ് സമയത്തെ രജനികാന്തിന്റെ ഒരു ചിത്രമാണ് ഇപ്പോൾ വൈറലാകുന്നത്. നീല ഡ്രസ്സ് ധരിച്ച് നിൽക്കുന്ന രജനിയെ ഈ ചിത്രത്തിൽ കാണാനാകും. ഇതോടെ ഈ രംഗങ്ങൾ എഐ ആണെന്ന വാദം പൊളിഞ്ഞിരിക്കുകയാണ് എന്നാണ് കമന്റുകൾ. നേരത്തെ രജനികാന്തിന്റെ ശബ്ദം മാത്രമാണ് ആ രംഗങ്ങളിൽ എഐ ഉപയോഗിച്ച് സൃഷ്ടിച്ചതെന്ന് ലോകേഷ് വ്യക്തമാക്കിയിരുന്നു. ഈ ലുക്കിൽ കൂടുതൽ സീനുകൾ വേണമായിരുന്നു എന്നും പ്രേക്ഷകർ ചിത്രത്തിന് താഴെ കമന്റ് ചെയ്യുന്നുണ്ട്. അതേസമയം, കൂലി ഇപ്പോൾ ഒടിടിയിൽ ലഭ്യമാണ്. ആമസോൺ പ്രൈമിൽ ആണ് ചിത്രം സ്ട്രീമിങ് ചെയ്യുന്നത്.

ഇന്ത്യയിൽ നിന്ന് മാത്രം ചിത്രം 235 കോടി രൂപ കൂലി നേടിയെന്നാണ് റിപ്പോർട്ട്. ആഗോള മാർക്കറ്റിൽ നിന്നും സിനിമ 500 കോടിക്കും മുകളിൽ നേടിയിട്ടുണ്ട്. ആദ്യ ദിനം ചിത്രം ആഗോള മാർക്കറ്റിൽ നിന്ന് 151 കോടിയാണ് നേടിയത്. നിർമാതാക്കളായ സൺ പിക്ചേഴ്സ് തന്നെയാണ് കളക്ഷൻ വിവരം സോഷ്യൽ മീഡിയയിലൂടെ പുറത്തുവിട്ടത്. ഒരു തമിഴ് സിനിമ ആഗോള തലത്തിൽ നിന്ന് നേടുന്ന ഏറ്റവും ഉയർന്ന കളക്ഷൻ ആണിത്. സൺ പിക്ചേഴ്സിന്റെ ബാനറിൽ കലാനിധി മാരനാണ് കൂലിയുടെ നിർമ്മാണം. ഗിരീഷ് ഗംഗാധരൻ ക്യാമറ കൈകാര്യം ചെയ്യുന്ന ചിത്രത്തിന്റെ എഡിറ്റിംഗ് നിർവഹിക്കുന്നത് ഫിലോമിൻ രാജ് ആണ്.

സിനിമയ്ക്ക് യു/എ സർട്ടിഫിക്കറ്റ് നൽകണമെന്ന് ആവശ്യപ്പെട്ട് നിർമാതാക്കളായ സൺ പിക്‌ചേഴ്‌സ് മദ്രാസ് ഹൈക്കോടതിയിൽ അപ്പീൽ നൽകിയിരുന്നു. കൂലിയിൽ അക്രമാസക്തമായ രംഗങ്ങൾ കുത്തിനിറച്ചിട്ടുണ്ടെന്നും അതിനാൽ മുതിർന്നവർ മാത്രമേ കാണാൻ പാടുള്ളൂ എന്ന് സെൻസർ സമിതിയും പിന്നീട് റിവൈസിങ് കമ്മിറ്റിയും വിലയിരുത്തിയതായി സെൻസർ ബോർഡിനുവേണ്ടി ഹാജരായ അഡീഷണൽ സോളിസിറ്റർ ജനറൽ എആർഎൽ സുന്ദരേശൻ ജസ്റ്റിസ് ടി വി തമിഴ്‌സെൽവിയുടെ ബെഞ്ചിനു മുൻപാകെ അറിയിച്ചു.

Content highlights: Coolie flashbck portion rajini still goes viral